កំណាព្យ

ចន្ទ - បទកាកគតិ
- ចន្ទអើយចន្ទខ្ពស់    ចន្ទនៅឆ្ងាយហួស    នៅឯវេហា
ចោលតែពន្លឺ    បំភ្លឺលោកា    តែឥតវាចា
    ហាក់គ្មាននិស្ស័យ    ។
- ហាក់ដូចមានភ័ព្វ    តែកម្មតាមជាប់    ពង្រាត់សេចក្ដី
ចន្ទចរផុតទៅ    នៅសល់អាល័យ    ចន្ទអើយចន្ទថ្លៃ
    ម្ដេចមិនមេត្តា    ។
- ចន្ទអើយចន្ទជាក់    បានគន់តែភក្ដ្រ    តែឥតវាសនា
គន់ហើយគន់ទៀត    ចង្អៀតចិន្ដា    ឱ! ដួងចន្ទថ្លា
    ឆក់យកហឫទ័យ    ។
- ឱ! ដួងចន្ទអើយ    ម្ដេចចន្ទព្រងើយ    កន្ដើយកវី
បើមិនមេត្តា    គួរកុំអភ័យ    ឱ! ចិត្តចន្ទថ្លៃ
    តើគិតយ៉ាងណា    ?
- ឱ! ចន្ទអើយចន្ទ    គួរកុំប្រកាន់    បើមានទោសា
ធ្វើម្ដេចកវី    សែនខ្លីវាសនា    គន់ដួងចន្ទថ្លា
    ចិត្តចង់បេតី    ។
- ឥឡូវចរផុត    រង្សីរលត់    អួលណែនកវី
យប់យន់ស្ងាត់សូន្យ    សល់តែរីងរៃ    សែននឹកអាល័យ
    រស្មីចន្ទថ្លា    ។
ជ្រោយអំពិល ថ្ងៃច័ន្ទ ទី២៩ ខែមិថុនា ឆ្នាំ២០១៥
កូយ សុខលាង